මොරගහකන්ද කළුගඟ ජලාශ ඉදිකිරීම නිසා රජරට ජනතාවට කෘෂිකර්මාන්තය සඳහා අවශ්‍ය ජලය පිළිබඳ ප‍්‍රශ්නයක් අනාගතයේ කිසිම දවසක ඇතිවන්නේ නැතැයි ජනාධිපති මෛත‍්‍රීපාල සිරිසේන මහතා අද (06) පොලොන්නරුවේ මැදිරිගිරියේදී ප‍්‍රකාශ කළේය.

මොරගහකන්ද ජලාශයට කිලෝමීටර් 07 ක් දුරින් උමගයක් ඔස්සේ ජලය ගෙන එන කළුගඟ ජලාශය හෙට දිනයේ විවෘත කරන බව ජනාධිපතිවරයා කීවේය.

ඒ මහා ජලාශවල වැඩ මේ වනවිට අවසන් බවත් වයඹට,රජරටට,නැගෙනහිරට ජලය ගෙන යන මහා ඇලවල් 03 ක් දැනට වැඩ පටන් ගෙන ඉදිරි අවුරුදුවලදී නිම කිරීමට ඇතැයිද පැවැසූ ජනාධිපතිවරයා ඒ සඳහා වැය කෙරෙන මුදල රුපියල් කෝටි 23000ක් බව කීය.

ඒ තුළ මාතලේ දිස්ත‍්‍රික්කය අනුරාධපුර, පොලොන්නරුව,කුරුණෑගල,ත‍්‍රීකුණාමලය දිස්ත‍්‍රික්කවල ජල ප‍්‍රශ්නය සම්පූර්ණයෙන්ම විසඳෙන බවද ජනාධිපතිවරයා පැවැසීය.

ඒ ප‍්‍රදේශවල ජනතාව දීර්ඝ කාලයක් තිස්සේ පැවැති ජල හිඟය පිළිබඳ කඳුළු කතාව නිමාවනු ඇති බවද ජනාධිපතිවරයා පැවැසීය.

ජනාධිපති මෛත‍්‍රීපාල සිරිසේන මහතා මේ බව කියා සිටියේ ‘‘පිබිදෙමු පොලොන්නරුව‘‘ දිස්ත‍්‍රික් සංවර්ධන වැඩසටහන යටතේ මැදිරිගිරිය කවුඩුළු මහින්ද මහා විද්‍යාලයේ අලුත්වැඩියා කරන ලද පන්ති කාමර ගොඩනැගිලි කිහිපයක් සිසු අයිතියට පැවැරීමෙන් අනතුරුව එහි පැවැති උත්සව සභාව අමතමිනි.

LEAVE A REPLY