පරිසරය රැක ගැනීමේ ප‍්‍රතිඥා මැතිවරණ වේදිකාවලට සීමා නොකර ඒවා නිසි ලෙස ක්‍රියාවට නැංවීමට බලයට පත්වන නායකයන් කටයුතු කළ යුතු බව ජනාධිපති මෛත්‍රීපාල සිරිසේන මහතා පවසයි.

ජනාධිපතිවරයා මේ බව ප‍්‍රකාශ කළේ අද පෙරවරුවේ (10දා) කොටුව ජනාධිපති මන්දිරයේ දී පැවති පරිසර නියමු ජනාධිපති පදක්කම් ප‍්‍රදානෝත්සවය අමතමිනි. වනාන්තර ආරක්ෂා කිරීම, රුක්රෝපණය සහ පරිසරයට සංවේදී වීම මෙන් ම ගහකොළ, ඇළ දොළ, සතා සිපාවට, මහ පොළොවට ආදරය කිරීම, සහ පෝෂණය කිරීම මිනිසුන් ලෙස අප ඉටු කළ යුතු මූලික වගකීමක් සහ යුතුකමක් බව ද ඔහු පැවැසීය.

එමෙන්ම තමා ජීවත්වන පරිසරය, ගහ කොළ, සතා සීපාවා රැක ගැනීමට දරුවන් කුඩා කාලයේ සිට පුරුදු පුහුණු වීමේ වැදගත්කම ද ජනාධිපතිවරයා පෙන්වා දුන්නේ ය.

පරිසර සංවේදි නායකයෙකු ලෙස පරිසරය රැක ගැනීම වෙනුවෙන් තමා ඉකුත් පස් වසර පුරා සුවිශේෂි වැඩ කොටසක් ඉටු කළ බව පැවසූ ජනාධිපතිවරයා පරිසරය රැක ගැනීම වෙනුවෙන් ඉතිහාසයේ පළමු වතාවට ත්‍රිවිධ හමුදාව යෙදවීමට තමා පියවර ගත් බව ද සිහිපත් කළේය.

ශ‍්‍රී ලාංකේය අනාගත පුරවැසියන් පරිසර හිතකාමීන් ලෙස සමාජගත කරමින් මාතෘ භූමියේ සුන්දර පරිසර උරුමය මතු පරපුරට දායාද කිරීම මුඛ්‍ය අරමුණු කර ගනිමින් මධ්‍යම පරිසර අධිකාරිය විසින් අධ්‍යාපන අමාත්‍යාංශයේ පූර්ණ අනුග‍්‍රහයෙන් ජාතික පරිසර නියමු වැඩසටහන මෙරට පාසල් පද්ධතිය තුළ කි‍්‍රයාත්මක කරනු ලබයි

පරිසර නියමුවෝ 40 දෙනෙක් මෙහිදී ජනාධිපති පදක්කමින් අභිසෙස් ලැබූහ.

 

LEAVE A REPLY