2018 වර්ෂයේ ගතවූ කාල සීමාව තුළ දිවයිනපුරා ඩෙංගු රෝගීන් 14,000 ක් පමණ වාර්තා වී ඇති අතර එය 2017වර්ෂයේ එම කාලය හා සැසදීමේදී 65% ක අඩුවීමක් බව ජාතික ඩෙංගු මර්දන ඒකකය පවසයි.

මෙම තත්වය තවදුරටත් අවම කරගැනීම සහ නිරිත දිග මෝසම් වැසි සමයත් සමඟ ඇතිවිය හැකි ඩෙංගු වසංගත තත්ත්වය වළක්වා ගැනීමේ අරමුණින් ජාතික මදුරු මර්දන සතියක් 2018 අප්‍රේල් 03 – 09යන දින වල මුළු දිවයිනම ආවරණය වන පරිදි සෞඛ්‍ය අමාත්‍යාංශය සහ ඩෙංගු මර්දනය පිළිබඳ ජනාධිපති කාර්ය සාධක බලකායේ මූලිකත්වයෙන් ක්‍රියාත්මක වෙයි.

එහිදී දිවයින පුරා ඩෙංගු වැඩි අවදානම් සෞඛ්‍ය වෛද්‍ය නිලධාරී කොට්ඨාශ 58ක දින 7ක් අවධානම් සෞඛ්‍ය වෛද්‍ය නිලධාරි කොට්ඨාශ 111ක දින 5ක් වශයෙන් මෙම වැඩසටහන ක්‍රියාත්මක වන අතර අප්‍රේල් 07ත් වන සෙනසුරාදා දිනය පාසල් පරිශ්‍ර පරීක්ෂා කිරීම සඳහා 08වන ඉරිදා දිනය ප්‍රජා දායකත්වයෙන් සිදුකරන ශ්‍රමදාන කටයුතු සඳහාද වෙන්කොට ඇත.

ජාතික මදුරු මර්දන සතිය සඳහා දිනකට ත්‍රිවිධ හමුදාවේ, පොලිසියේ, සිවිල් ආරක්ෂක බලකායේ සහ ප්‍රජා සෞඛ්‍ය කණ්ඩායම් සාමාජිකයන් 10,000ක් සිය සහභාගීත්වය ලබාදෙයි.

මෙම වැඩසටහනේ පළමු දිනය තුළ පරිශ්‍ර 47720 පරීක්ෂා කරන ලද අතර 18% මදුරුවන් බෝවන සේ තබා ගෙන ඇති අතර 2% ක මදුරු කීටයන් හමුවී ඇත.

තවද නිවාස, පාසල්, වැඩබිම්, ආයතන, කර්මාන්ත ශාලා, ආගමික ස්ථාන, පොදු ස්ථාන වැනි ඕනෑම පරිශ්‍රයක ඩෙංගු මදුරුවන් බෝවීමට අවධානමක් ඇති හෙයින්,අවම වශයෙන් සතියකට විනාඩි 30 ක් මේ පිළිබඳව විපරම් කොට මදුරුවන් බෝවිය හැකි ස්ථාන ඉවත් කර ගන්නා ලෙස ජාතික ඩෙංගු මර්දන ඒකකය මහජනතාව වෙත අවධාරණය කරන අතර මේ සඳහා සියලූ දෙනාගේ සහයෝගය අපේක්ෂා කරයි.

ඕනෑම අයෙකුට තද උණ සමඟ හිසරදය, මස්පිඩු හා සන්ධි වේදනාව, ඔක්කාරය හා වමනය, සමෙහි රතු පැහැ ලප හට ගැනීම හා රුධිර වහන තත්ව ඇත්නම් වහාම රෝහලකට හෝ සුදුසුකම් ලත් වෛද්‍ය වරයෙක් වෙත ගොස් නිසි ප්‍රතිකාර ලබා ගන්නා මෙන් ජාතික ඩෙංගු මර්දන ඒකකය උපදෙස් දෙයි.

ජාතික ඩෙංගු මර්දන සතිය පසුගිය 03 දා ආරම්භ වුයේ කොළඹ මහනගර සභා භුමියෙන් වන අතර නගරාධිපතිනී රෝසි සේනානායක මහත්මිය සම සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතාගේ ප්‍රධානත්වයෙන් එම උත්සවය පැවැත්විනි.

LEAVE A REPLY