මුතුරාජවෙල අභය භූමි ප‍්‍රදේශයේ සිදුකෙරෙන ඉදිකිරීම්, ගොඩකිරීම් ඇතුළුපරිසර විනාශයට හේතුවන සියලූ කි‍්‍රයාකාරකම් වහාම තහනම් කිරීමට ජනාධිපතිතුමා අදාළ අංශවලට උපදෙස් දී ඇත.

එහි යම් ඉඩම් කොටස් ගොඩකිරීම සඳහා යම් රාජ්‍ය ආයතනයක් මගින් දැනට කුමන හෝ අවසරයක් ලබාදී ඇත්නම් ඒ සියල්ල අහෝසි කිරීමට ද ජනාධිපතිතුමා මෙහිදී උපදෙස් දී තිබේ.

එමෙන්ම මෙවැනි පරිසර විනාශයන්ට අනුග‍්‍රහය දක්වන හෝ දැක්වූ රාජ්‍ය නිලධාරින් සිටීනම් ඔවුන්ට එරෙහිව ද විනය කි‍්‍රයාමාර්ග ගැනීමට ජනාධිපතිතුමා අදාළ අංශ දැනුවත් කොට ඇත.

මෙරට වැදගත් තෙත්බිම් පද්ධතියක් වන මුතුරාජවෙල අභය භූමිය ආශි‍්‍රතව සිදුකෙරෙන පරිසර විනාශයන් පිළිබඳව පසුගියදා දිගින් දිගටම මාධ්‍ය වාර්තා පළ කෙරුණු අතර ඒ පිළිබඳඅවධානය යොමු කළ ජනාධිපතිතුමා අද (22) අළුයම එම ප‍්‍රදේශයේ නිරික්ෂණ චාරිකාවක නිරත විය.

අනතුරුව ප‍්‍රදේශයේ මැති ඇමතිවරුන්, රාජ්‍ය නිලධාරින් මෙන්ම ආරක්ෂක අංශ ප‍්‍රධානින් සමග විශේෂ සාකච්ඡාවකට එක්වෙමින් ඉහත තීරණවලට එළැඹිණි.

පරිසර සංරක්ෂණ ප‍්‍රදේශයක් ලෙස මෙහි පවතින සියලූ ඉඩම් වනජීවි සහ පරිසර සංරක්ෂණ කලාප ලෙස ගැසට් කිරීමේ හැකියාව පිළිබඳනීති උපදෙස් ලබාගැනීමට ද ජනාධිපතිතුමා මෙහිදී නිලධාරින්ට උපදෙස් දෙන ලදී.

සින්නක්කර ඔප්පු සහිත ඉඩමක වුව ද පාරිසරික බලපෑම් ඇතිකරන්නේ නම් එහි ගොඩකිරීම් සහ ඉදිකිරීම් සඳහා ඉඩදිය නොහැකි බව අවධාරණය කළ ජනාධිපතිතුමා මෙම කි‍්‍රයා පිටුපස දේශපාලන බලවේග තිබේනම් ඒවාට එරෙහිව ද නොපැකිළිව කටයුතු කරන බව කියා සිටියේය.

මුතුරාජවෙල අභය භූමි ප‍්‍රදේශයේ සිදුකෙරෙන පරිසර විනාශයන් මැඩලීම සඳහා එම ප‍්‍රදේශයට පොලිස් විශේෂ කාර්ය බලකායේ ආරක්ෂාව සහ ප‍්‍රවේශ මාර්ගවලට මාර්ග බාධක යෙදවීමට ද ජනාධිපතිතුමා මෙහිදී පොලිස්පතිවරයා වෙත උපදෙස් දුන්නේය.

මෙම ප‍්‍රදේශය තුළ සිදුකෙරෙන ගොඩකිරීම් සඳහා පස් ලබාදෙන ස්ථානවලට භූ විද්‍යා පර්යේෂණ හා පතල් කාර්යාංශය මගින් බලපත‍්‍ර නිකුත්කර තිබේනම් ඒවා ද වහාම අවලංගු කිරීමට ජනාධිපතිතුමා මෙහිදී නියෝග කරන ලදී.

පර්චසය රුපියල් 500/- ඉඩම් ගණුදෙනුව සොයන්න ජනපති මුතුරාජවෙල යයි..!
මුතුරාජවෙල අභයභුමියට අයත් පර්චස් 65102 ක ප්‍රමාණයක් පර්චසය රුපියල් 500/- ගණනේ පෞද්ගලික ආයතනයකට පැවරීමට ගෙන ඇති තීරණය සම්බන්ධයෙන් කරුණු විමසා බැලීම සඳහා ජනාධිපති මෛත්‍රීපාල සිරිසේන මහතා හදිසියේ අද (22) පෙරවරුවේ ජා ඇල, දැලතුර, තාරකුලිය ප්‍රදේශයට පැමිණ ඇත.

ඉන්පසු ජනාධිපතිවරයා රාජ්‍ය අංශ නිලධාරීන් සහ පරිසරවේදීන් සමඟ කෙටි සාකච්ඡාවක ද නිරතවී ඇතැයි පැවසේ.

මුතුරාජවෙල මෙම භුමි පැවරුම සිදුකොට ඇත්තේ සපුරාම නීතිවිරෝධී ආකාරයට බව ඉඩම් හා කෘෂිකර්ම ප්‍රතිසංස්කරණ ව්‍යාපාරය විසින් පෙන්වා‍දෙන ලදුව ජනාධිපතිවරයාගේ කඩිනම් අවධානය ඒ පිළිබඳව යොමුව තිබේ. නමුත් තතු දත් ආරංචි මාර්ග පවසනුයේ මෙම ඉඩම් පැවරීමට ආණ්ඩුවේ ප්‍රබලතමයන් කිහිප දෙනෙකුගේ සෘජු සම්බන්ධතාවයක් ඇති බවය.

ප්‍රසංග පෙරේරා – ජා ඇල

LEAVE A REPLY