හෙළයේ මහා ගොවි පි‍ළිවෙත, ජාතික අලුත් සහල් මංගල්‍යය ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ශ්‍රීමහා බෝ සමිඳුන් අබියසදී ඊයේ (08) පෙරවරුවේ පැවැත්විණි.

මාස් කන්නයේ නෙළාගත් අස්වැන්නේ නොඉඳුල් සහලින් මහා බෝ සමිඳුන් පිදීමේ මෙම උත්කර්ෂවත් මංගල්‍යය අටමස්ථානාධිපති ආචාර්ය පල්ලේගම සිරිනිවාස නායක ස්වාමීන් වහන්සේගේ අනුශාසනා පරිදි කෘෂිකර්ම අමාත්‍යාංශය සහ ගොවිජන සේවා දෙපාර්තමේන්තුව මඟින් 51 වන වරටත් සංවිධානය කර තිබුණි.

පුරාතනයේ සිට පැවත එන මෙම චාරිත්‍රය සඳහා රටපුරා ගොවින් රැසක් එක්ව සිටි අතර ‘කලට වැසි වසිත්වා – කෙත්වතු සාර වේවායි’ ප්‍රාර්ථනා කිරීමත් කෘෂිකර්මාන්තයෙන් රට ස්වයංපෝෂිත වී සමෘද්ධිමත් ආර්ථිකයක් ඇති වේවායි රටට, දැයට සෙත් පැතීමත් මෙහිදී සිදුකෙරිණි.

අලුත් සහල් මංගල්‍යයට එක්වූ ජනාධිපතිතුමා පළමුව මහා බෝ සමිඳුන් වැඳ පුදාගෙන රිදී කාසි පූජාව සිදුකර ආශිර්වාද ලබා ගත්තේය.ඉපැරණි චාරිත්‍රයන් අනුව යමින් මහා බෝ සමිඳුට වස විස නැති දේශීය සහල් පූජා කිරීම සංකේතවත් කරමින් පාත්‍රය වෙත සහල් පුජා කිරිම ද ජනාධිපතිතුමා අතින් සිදුවිය.

සාම්ප්‍රදායිකව ශ්‍රී මහා බෝ සමිඳුන් වෙත පුජා කෙරෙන මීපැණි පූජාව සඳහා පිරිසිදු මී පැණි බඳුන ඌරුවරිගේ වන්නිල ඇත්තන් විසින් ජනාධිපතිතුමා වෙත පිළිගැන්වූ අතර ශ්‍රී මහා බෝ සමිඳුන් පූජා කෙරෙන ගිතෙල් පූජාව සඳහා සබරගමුව ඓතිහාසික සමන් දේවාලයෙන් රැගෙන ආ ගිතෙල් බඳුන ද මෙහිදී ජනාධිපතිතුමා වෙත පිළිගැන්විණි.

ශ්‍රී ලංකා ජාතික ගොවි සංවිධාන බල මණ්ඩලයේ සාමාජිකයින් වෙත එහි හැඳුනුම්පත් ලබාදීමද සියලු පළාත් ආවරණය වන පරිදි ඒ ඒ ප්‍රදේශවලට ආවේණික වූ බීජ වී වර්ග ගොවීන් වෙත බෙදාදීමද ජනාධිපතිතුමා අතින් මෙහිදී සිදුවිය.

කෘෂිකර්ම අමාත්‍ය දුමින්ද දිසානායක මහතා විසින් අලුත් සහල් මංගල්‍යය පිළිබඳ සමරු කලාපය මෙහිදි ජනාධිපතිතුමා වෙත පිළිගැන්වීය. අටමස්ථානාධිපති උතුරු මධ්‍යම දෙදිසාවේ ප්‍රධාන සංඝනායක ආචාර්ය පූජ්‍ය පල්ලේගම සිරිනිවාස නායක හිමිපාණන් වහන්සේ ප්‍රමුඛ මහා සංඝරත්නයද කෘෂිකර්ම අමාත්‍ය දුමින්ද දිසානායක, අමාත්‍යවරුන් වන චන්ද්‍රානී බණ්ඩාර, පී. හැරිසන්, නියෝජ්‍ය අමාත්‍ය ලසන්ත අලගියවන්න, පාර්ලිමේන්තු මන්ත්‍රී වීරකුමාර දිසානායක, උතුරු මැද පළාත් ආණ්ඩුකාර පී. බී. දිසානායක යන මහත්ම මහත්මීන් ඇතුළු දේශපාලන නියෝජිතයින් පිරිසක් ද කෘෂිකර්ම අමාත්‍යාංශයේ ලේකම් බී. විජේරත්න, ගොවිජන සංවර්ධන කොමසාරිස් ජනරාල් ඩබ්. එම්. එම්. බී. වීරසේකර මහතා ඇතුළු රජයේ නිලධාරිහු පිරිසක්ද මේ අවස්ථාවට එක්ව සිටියහ

LEAVE A REPLY